Хүний хөгжил гэдэг байнгын арчилгаа тордлоготой байдаг цэцэг, навч, мод, буттай адил ажгуу. Хүнээ хөгжүүлж, тэднийхээ боловсрол, мэдлэг, оюун санаанд тогтмол шинэ санаа, мэдлэг мэдээлэл түгээн хүртээж баймаажин нийгмийн дэвшил аандаа бий болно. Өөр орчин, өөр хөгжил, дэвшил үзэж, харж, алдаа оноог нь хаяад, авч хэрэгжүүлж болохыг нь аваад өөрийн орчин, аймаг, сум багтаа илүү дэвшилтэйгээр нэвтрүүлэн хөгжүүлэх юм. Сум багуудын засаг дарга нарын Улаанбаатарт ажиллах хоёр өдрийн томилолт энэ өглөө эхэллээ. Тэд юун түрүүн "Хувь хүний хөгжлийн институт"-д өөрийгөө нээж, өрөөлд үлгэр үзүүлэх, хүмүүс хоорондын харьцаа, соёл чиглэлээр хагас өдрийн номын дуу сонсож, хотын томоохон дүүргүүд, хороо, хэсгүүдийн ажил, бүтээн байгуулалт, ногоон байгууламжууд, хог хаягдлын менежменттэй танилцан туршлага судална.